2018 X 06 Rusyn Takes
Rusyn Takes – найновша платня (четверта по дебютанцкій Весна весною, Пісні і співанкы Петра Мурянкы – обі з 2013 р. і з 2016 р. Анна Вік-торя з піснямы з репертуару Анны Ґерман) выдана стараньом Стоваришыня «Руска Бурса» в Ґорлицях, хоц в великій мірі полныма пригорщамы черпат з русыньского фолькльору, то здецидувані награным творам надає нове жытя. Заберат слухача в музичный простор, інспіруваний піснямы од Закарпатя през Гуцульщызну і Словацию, аж по Лемковину. Rusyn Takes то тіж пісні авторскы. Трудно єй назвати лем фольковом, бо Сусанна Яра в процесі творчым, з любови до музыкы і, так просто, чловечой цєкавости, все іде в страну, де веде ей выняткова інтуіция. Велика вражливіст і культура дозваляют артистці на лучыня того, што, здавало бы ся, зо собом не заграт. А єднак...
З великом радістю оддаю в Вашы рукы Rusyn Takes, платню зо знаныма і менше знаныма народныма і авторскыма піснямы – пише на окладинці Rusyn Takes. – Дякую Стоваришыню «Руска Бурса» в Ґорлицях за спілпрацу – бурса є вынятковым місцьом і подля мене барз важным для лемківской культуры. Кєд бы не іх ініцятива, тота платня бы не возникла. Хочу подякувати і родичам за тото, же в 1992 р., коли переносили ся з Украіны до Польщы, выбрали Лемковыну, бо кєд бы не тото, не познала бы-м той краіны з цілым єй богацтвом і ріжнородностю. Не познала бы-м і мого мужа і його родины, дякы котрым іщы ліпше познаю Лемків. Днес вельох думат, же єм Лемкыньом, а я ся усьміхам і беру тото за знак, же хыбаль не ганьбю лемківскых пісен і можу занимати ся нима далі.

(ciąg dalszy dostępny w wersji drukowanej lub w E-wydaniu Przeglądu Prawosławnego)

Анна Рыдзанич
© Fundacja im. Księcia Konstantego Ostrogskiego